دك حمله الصبر

دك حمله الصبر باعتابج وادبر .. يمن وياج مل الزمن وتحير

تطيح جبال لو مرهه العسر فد يوم .. وانتي من المهد من الصبر اكبر

يحضروله الزغير الدنيه بالتزيين .. ودرب النايبات لجدمج محضر

اجيتي وما دريتي الحزن يتلكاج .. وسنينج فجيعه بهضم تتوزر

بجت وياج وانهد حيلهه الدنيه .. ونزل دمعه الوصي بمولدج من كبر

تناشد فاطمه الزهره يبو الصبطين .. ليش بمدمعك للطاهره تجهر

يكول الله يا صبر الضنى على الضيم .. ومثل زينب وحقج ما بشر يصبر

ياروح الرسول ويا نفس كرار .. يا هيبه خديجه وسجده الكوثر

يابيت المحنه الفيه للخوان .. يا وجه الوفه البالمنزلات انور

يادنيه مواقف عجز بيج الكون .. والطاغوت من اعجازج تمرمر

وارد والكه الحزن وياج مثل الضل .. ولا عن شاخصج فد يوم يتعذر

بده وياج الهضم وي كسر ضلع امج .. وطيحه محسن ابن المرتضى حيدر

دمه عصر الضلوع الجسد والبسمار .. طعناته بجسد امج وقعهه اكبر

وجنه بصوت وبحسره الضلع من صاح .. يزينب شمر سوطه عليج اشد واكثر

دخليه ياليتيمه الحزن والونات .. جاياتج جثيره ايام المكدر

الج يوم الوصي بمحرابه تجري دماه .. وعبراتج تضل بحشاج تتكسر

ويوم تشوف عينج مالم المسموم .. البطشت النوايب جبده يتوذر

وموبس سم ينول حشاه يا حوراء .. بسهام الغدر هم نعشه يتشجر

وتوكفله الرماح بكثر لون الليل .. وتصيح اهل الكفر يحسين ما تكدر

ويكدر بس وصيه من الحسن وصاه .. وحشه الوفاي عن وصيته يتاخر

ولتراب البقيع يرد اخوج انوب .. ويرد الحزن وصدور تجرع مر

ولو ردت اتجه لارض الطفوف انوب .. اشيجي بيه العقل لو راد يتصور

يا لبوه اسود وبيج معنى الزود .. يا ضبيه خدر بيج الوفه معطر

واخبرج يا بنت كرار ما اخفيج .. الج يوم الدمه تفيض على كل محضر

اخوتج والضنى وانصار ابو السجاد .. تصير انهار دم وبكربلا المنحر

وابطال الهواشم تغدي عالتربان .. منحوره بدماهه وعالارض منثر

عطش ايتامكم بالهيمه حيل تصيح .. وعلي الاكبر مخضب جسمه ومطبر

وجاسم تعتنيله الكوم توجر بيه .. وتنهال السيوف عليه من يعثر

وابو فاضل يندبه مناشد الاطفال .. يعمنه الماي وينه وطلب يتكرر

ويشد روحه ابو الغيره برايته وبحسين .. ويتعنه الالوف وللنهر ينحر

ويوصل للشريعه ويلكه جن مو ماي .. دمع صار النهر وبجفه يتكطر

رجع والروس جن تتطاير بممشاه .. واحتار الخصم لزنوده ما يكدر

بس ضربه غدر من طاح ابو النوماس .. وسفه جفوف اخي حسين تتبتر

عليه سهامهم ويه المنايه تميل .. وجسمه على النهر بسيوف يتوذر

وحتى البالمهد هم ينجتل عطشان .. لان لا رحمه منهم واللبن مادر

تعناه السهم جن للنحر مشتاك.. ومن سنين لا طرش عليه لا مر

والاصعب من تنول الكوم ابو السجاد .. وعد راس الشهيد الشمر يتبختر

وموبس كطع راس حسين يوفي الكوم .. يتمادون الذبيح بكطعه الخنصر

ويسحكونه الغريب وحيل بيه تدوس .. خيل يزيد والكرات تتكرر

ويحركون الخيم وتهيج بيهه النار .. واطفال وحرم بالجول تتطشر

ويفر بيج الفكر لام الحسن وحسين .. مثل سرب الحمام المعتني لو جر

وتناجين الزجيه بصوت يا زهراء .. ولا عالبال فكد العايله يخطر

ييمه اليوم ما ضل عالارض وليان .. النوايب كلت مني اليابس واخضر

ويضل فكرج محير عالتلول هناك .. وتصير الوسعه دورة محبس وازغر

وعيون الشماته مسابك ويه الخيل .. يكصدونج يحره وهمهم المنضر

وسبي للشام يا بنت الفحل تمشين .. مجتوفه بسناسل والجتف محمر

وما يخلص طفل الا وتجره حبال .. والسجاد فوك المرض يتاسر

يدنيه وما ابطل انه العتب وياج .. نخيتي على العقيله الحاقد المغتر

بس تبقى الشريفه ام المصايب حيل .. ناخذ حيل منه وحيل نتبشر

وتضل رايه فخر وترف لبو السجاد .. تصيح حسين روحي لساعه المحشر
رحيم الحسناوي